ისტორია

"მნიშვნელობა არ აქვს, ვინ დატოვებს გუნდს, სახელი მანჩესტერ იუნაიტედი არსად არ მიდის" - სერ ალექს ფერგიუსონი

 

ადრეული წლები

 

1878 წელს, ნიუტონ ჰიტის დეპოში მომუშავე მუშებმა დაარსეს საფეხბურთო კლუბი “Newton Health LYR” – „ლანკაშირისა და იორკშირის რკინიგზის საფეხბურთო კლუბი“. კლუბი 1892 წელს საფეხბურთო ლიგას შეუერთდა.

მე-20 საუკუნის დასაწყისში ფინანსური პრობლემების გამო, კლუბი დაშლის და გაუქმების პირას იყო. ამ დროს გამოჩნდა ერთ-ერთი მანჩესტერული ლუდსახარშის მფლობელი, ჯონ ჰენრი დეივისი, რომელმაც კლუბში ინვესტიცია განახორციელა და გაუქმებისგან იხსნა. არსებობს ლეგენდაც, რომ გუნდის კაპიტნის, ჰარი სტაფორდის, მრავალი ჯილდოს მომგები სენბერნარის ჯიშის ძაღლი დაიკარგა, რომელიც დეივისს შეხვდა, თავისმხრივ მას ის ძალიან მოეწონა და თავისი ქალიშვილისთვის ყიდვა ისურვა. პატრონის პოვნის შემდეგ, შეხვედრისას სტაფორდმა შეძლო დეივისის დარწმუნება, რათა კლუბში ინვესტიცია ჩაედო და გამხდარიყო თავმჯდომარე.

1902 წელს, მრავალ ვარიანტს შორის, კლუბის ახალ სახელად „მანჩესტერ იუნაიტედი“ შეირჩა. კლუბი უკვე ახალ წითელ მაისურებს, თეთრ შორტებს და შავ წინდებს იცვამდა.

მომდევნო სეზონში კლუბის მწვრთნელი ერნესტ მენგნალი გახდა, რომლის მიზანიც „მანჩესტერ იუნაიტედის“ პირველ დივიზიონში გადაყვანა იყო. სატრანსფერო ბაზარზე მან რამდენიმე კარგი მოთამაშე შეიძინა და საბოლოოდ, 1905-06 წლების სეზონში, „მანჩესტერ იუნაიტედი“ უმაღლეს დივიზიონში აღზევდა. 1908 წელს კლუბი პირველად გახდა ინგლისის ჩემპიონი, რაშიც უდიდესი წვლილი სენდი ტერნბულმა და ბილი მერედითმა შეიტანეს, ორივე ფეხბურთელი მენგნალმა „მანჩესტერ სიტიდან“ გადაიბირა. ჩემპიონობის დახმარებით გუნდმა ინგლისის სუპერთასზე თამაშიც მოახერხა, სადაც „ქუინზ პარკ რეინჯერსი“ დაამარცხა, შემდეგ სეზონში კი „მანჩესტერ იუნაიტედი“ ინგლისის ასოციაციის თასსაც დაეუფლა.

1909-10 წლების სეზონიდან კლუბის ისტორიაში ახალი ფურცელი იშლება, „მანჩესტერ იუნაიტედი“ ოლდ ტრაფორდზე გადაბარგდა. ახალ მოედანზე პირველი მატჩი 1910 წლის 19 თებერვალს გაიმართა, „მანჩესტერ იუნაიტედი“ სამბურთიანი სხვაობით იგებდა „ლივერპულთან“, თუმცა საბოლოოდ 4-3 დამარცხდა.

მომდევნო სეზონში, კლუბმა ისტორიაში მეორედ შეძლო ინგლისის ჩემპიონატის მოგება, ისევე, როგორც სუპერთასის, სადაც ფინალურ მატჩში ჰაროლდ ჰალსიმ 6 გოლი გაიტანა.

1911-12 წლების სეზონი კლუბისთვის მძიმე გამოდგა, სეზონის მე-13 პოზიციაზე დასრულების შემდეგ, ერნესტ მენგნალი „მანჩესტერ სიტის“ შეუერთდა, რამაც „მანჩესტერ იუნაიტედის“ შედეგების გაუარესება გამოიწვია.

მოგვიანებით, პირველი მსოფლიო ომის გამო ინგლისის ჩემპიონატი შეწყდა, თუმცა განახლების შემდეგაც არ ედგათ მანჩესტერელებს კარგი დრო. გუნდის მთავარი ლიდერი ახალგაზრდა ჯო სპენსი იყო, თუმცა მისმა გატანილმა გოლებმა ვერ იხსნა „მანჩესტერ იუნაიტედი“ მეორე დივიზიონში გავარდნისგან. „იუნაიტედი“ მხოლოდ 3 წლის შემდეგ დაბრუნდა უმაღლეს ლიგაში, თუმცა გუნდი კვლავ არასტაბილურად გამოიყურებოდა.

შედეგები არ გამოსწორებულა 1930-იან წლებშიც. ამ ათწლეულის პირველივე სეზონში „მანჩესტერ იუნაიტედი“ ისევ დაქვეითდა მეორე დივიზიონში, თუმცა სხვა პრობლემებიც წარმოჩინდა. ცუდი ასპარეზობის გამო, დამსწრე გულშემატკივრების რაოდენობამ მოიკლო, ეს კი შემოსავლის შემცირებას ნიშნავდა. ამის გამო, კლუბი მოთამაშეებს ხელფასს ვერ უხდიდა და გაკოტრების პირას იყო, თუმცა გამოჩნდა ჯეიმს გიბსონი, რომელმაც საკუთარი თანხა გადაურიცხა კლუბს. გიბსონი „იუნაიტედის“ დირექტორად დაინიშნა და მან ახალი მთავარი მწვრთნელი, სკოტ დანკანი მოიყვანა.

სიტუაცია მაინც არ გამოსწორებულა, კლუბი ძალიან ახლოს იყო მესამე დივიზიონში გავარდნასთან, თუმცა ბოლო ტურში „მილუოლთან“ გამარჯვებით „მანჩესტერ იუნაიტედი“ გადარჩა.

1935-36 წლებში „იუნაიტედი“ მეორე დივიზიონის გამარჯვებული გახდა და უმაღლეს ლიგაშიც დაბრუნდა, თუმცა ძალიან მცირე ხნით. კლუბი ისევ ძალიან არასტაბილური იყო და მუდმივად მოძრაობდა პირველ-მეორე დივიზიონებს შორის, მეორე მსოფლიო ომის დაწყებამდე კი უმაღლეს დივიზიონში ადგილი დაიბევა.

 

მეტ ბასბის ეპოქა

 

1945 წელს, „მანჩესტერ იუნაიტედის“ მწვრთნელი შოტლანდიელი მეტ ბასბი გახდა, საიდანაც კლუბის ახალი ისტორია დაიწყო. მას სურდა, რომ შეექმნა ეროვნული ტურნირებისთვის სტაბილურად მებრძოლი კლუბი, საქმიანობა მან კარგად დაიწყო. პირველივე სეზონში ის ახლოს იყო ჩემპიონობასთან, „იუნაიტედმა“ მე-2 პოზიცია დაიკავა. ბოლო 36 წლის განმავლობაში კლუბს ამაზე მაღალ პოზიციაზე სეზონი არ დაუსრულებია.

მომდევონ სეზონში, „იუნაიტედი“ ასოციაციის თასის გამარჯვებული გახდა, 1952 წელს კი 41-წლიანი შესვენების შემდეგ მანჩესტერელები ინგლისის ჩემპიონებიც გახდნენ. კლუბი ლიდერებმა - ჯონი მორისმა და ჩარლი მიტენმა დატოვეს, მაგრამ ბასბი აგრძელებდა თავის პოლიტიკას, მან შემადგენლობაში ახალგაზრდები დააწინაურა. ამავდროულად ბასბი სატრანსფერო ბაზარზეც აქტიურობდა და რამდენიმე ძვირადღირებული ტრანსფერიც განახორციელა. 1956 წელს „მანჩესტერ იუნაიტედი“ კიდევ ერთხელ გახდა ინგლისის ჩემპიონი, მომდევნო სეზონში „ბასბის ჩვილები“ ისევ დაეუფლნენ თასს და ასოციაციის თასის ფინალშიც გავიდნენ, სადაც „ასტონ ვილასთან“ დამარცხდნენ. კლუბის საშუალო ასაკი 22 წელი იყო.

1957 წელს „მანჩესტერ იუნაიტედი“ გახდა პირველი ინგლისური კლუბი, რომელმაც ჩემპიონთა თასის (დღევანდელი ჩემპიონთა ლიგა) გათამაშებაში მიიღო მონაწილეობა. კლუბს ბრწყინვალე დებიუტი გამოუვიდა და პირველივე მატჩში 1-0 დაამარცხა „ანდერლეხტი“. შემდეგ ეტაპებზე „მანჩესტერ იუნაიტედმა“ ტურნირიდან „ბორუსია“ და „ატლეტიკი“ გამოთიშა, თუმცა ნახევარფინალში „რეალთან“ დამარცხდა.

1958 წელის 6 თებერვალს დიდი ტრაგედია დატრიალდა. ჩემპიონთა თასის მეოთხედფინალში, „ცრვენა ზვეზდას“ დამარცხების შემდეგ, „მანჩესტერ იუნაიტედის“ თვითმფრინავი, რომელსაც მოთამაშეები, პერსონალი და ჟურნალისტები გადაჰყავდა, მიუნხენში დაეშვა საწვავის შესავსებად. რამდენიმე ცდის შემდეგ თვითმფრინავმა აფრენა ვერ შეძლო, მალევე კი მან კატასტროფა განიცადა. საბოლოოდ, 23 ადამიანი დაიღუპა, მათ შორის კი 8 ფეხბურთელი : ჯეფ ბენტი, როჯერ ბირნი, ედი კოლმანი, დანკან ედვარდსი, მარკ ჯონსი, დეივიდ პეგი, ტომი ტეილორი და ლიამ უილანი.

მეტ ბასბი გადარჩა და სანამ ის მკურნალობდა, გუნდს ჯიმი მერფიმ უხელმძღვანელა. „იუნაიტედი“ ასოციაციის თასის ფინალშიც გავიდა, სადაც „ბოლტონ უონდერესთან“ დამარცხდა.

1960-იან წლებში ბასბიმ ახალი გუნდის შენება დაიწყო, მთავარი ლიდერები კი მიუნხენის ავიაკატასტროფაში გადარჩენილი ფეხბურთელები, დენის ვაიოლეტი, ბობი ჩარლტონი და ბილ ფოულკსი იყვნენ. კლუბმა 115 000 გირვანქის სანაცვლოდ შეიძინა დენის ლოუც, ასევე გუნდის აკადემიიდან გადმოიყვანეს ნობი სტაილსი.

1962-63 წლების სეზონში, მიუნხენის ტრაგედიის შემდეგ, „მანჩესტერ იუნაიტედი“ პირველად დაეუფლა ტიტულს. გუნდმა ასოციაციის თასის ფინალში „ლესტერ სიტი“ 3-1 დაამარცხა. ამ სეზონში შედგა ლეგენდარული ჯორჯ ბესტის დებიუტი.

1964-65 წლებში, „მანჩესტერ იუნაიტედს“ მრისხანე შემტევი ტრიო ჰყავდა, ბესტი-ლოუ-ჩარლტონის სახით. მათი დახმარებით კლუბი ინგლისის ჩემპიონი გახდა და ბაზრობათა თასის ნახევარფინალშიც გავიდა, სადაც „ფერენცვაროშთან“ დამარცხდა.

1964 წელს კი „მანჩესტერ იუნაიტედის“ ისტორიაში პირველად დაეუფლა მოთამაშე ოქროს ბურთს, ეს დენის ლოუმ შეძლო. 2 წლის შემდეგ იგივე ბობი ჩარლტონმაც მოახერხა.

1966-67 წლებში, „იუნაიტედი“ კიდევ ერთხელ გახდა ინგლისის ჩემპიონი, მომდევნო წელს კი პირველი ინგლისური გუნდი გახდა, რომელმაც ჩემპიონთა თასი მოიგო. „იუნაიტედმა“ ნახევარფინალში 4-3 დაამარცხა „რეალი“, ფინალში კი მათ გამარჯვება „ბენფიკას“ წინააღმდეგ იზეიმეს. ტრაგედიიდან 10 წლის შემდეგ, მეტ ბასბიმ დიდებულ შედეგს მიაღწია, რაც ასეთი მნიშვნელოვანი იყო. ფინალის შემდეგ, მეტ ბასბის რაინდის წოდება მიენიჭა.

1968 წელს ოქროს ბურთს „იუნაიტედის“ მორიგი მოთამაშე, ამჯერად ჯორჯ ბესტი დაეუფლა. მომდევნო სეზონში კლუბმა წარუმატებლად იასპარეზა ყველა ტურნირზე და სერ მეტ ბასბიმ მწვრთნელის თანამდებობა დატოვა.

 

ნაბიჯები ფერგიუსონამდე

 

ბასბის შემცვლელი „მანჩესტერ იუნაიტედის“ რეზერვების გუნდის მწვრთნელი, უილფ მაკგინესი გახდა, მაგრამ მან ვერ გაამართლა გაცემული ავანსები. კლუბის ვარსკვლავების ნაწილი დაბერდა, ნაწილი კი მას არ ემორჩილებოდა. მოგვიანებით მან დენის ლოუს და შეი ბრენანის გაყიდვა ცადა, რის გამოც გაათავისუფლეს თანამდებობიდან. დროებით მწვრთნელად სერ მეტ ბასბი დაბრუნდა, 1971 წლის ივნისში კი „მანჩესტერ იუნაიტედი“ ფრენკ ო’ფარელმა ჩაიბარა. წარმატებას ვერც ირლანდიელმა მიაღწია და ის სულ რაღაც 6 თვეში, „კრისტალ პალასთან“ 5-0 მარცხის შემდეგ მოხსნეს პოსტიდან.

შემდეგი რამდენიმე სეზონი „მანჩესტერ იუნაიტედი“ ისევ ძალიან არასტაბილური იყო. კლუბმა რამდენიმეჯერ წარმატებას მიაღწია, თუმცა ასევე რამდენიმეჯერ დატოვა უმაღლესი დივიზიონი. 1986 წლამდე კლუბმა უამრავი მწვრთნელი შეიცვალა და თაობათა ცვლა აქტიურად მიმდინარეობა.

 

სერ ალექსის ეპოქა

 

1868 წლის 6 ნოემბრიდან  „იუნაიტედში“ ძალიან დიდი ეპოქა დაიწყო - კლუბის მთავარი მწვრთნელი სერ ალექს ფერგიუსონი გახდა.

შოტლანდიელი მწვრთნელი იქამდე „აბერდინს“ ხელმძღვანელობდა, სადაც თითქმის ყველა შოტლანდიური ტიტული მოიპოვა და „სელტიკი“-„რეინჯერსის“ ჰეგემონია დაამხო. მან თასების მფლობელთა თასის ფინალშიც გააღწია, სადაც „რეალთან“ დამარცხდა.

ფერგიუსონს რამდენიმე წელი დასჭირდა, რათა ახალი გუნდი აეშენებინა. მის გუნდში დიდი ცვლილებები მიმდინარეობდა, რამდენიმე მოთამაშეს წასვლა მოუწია. სადებიუტო სეზონში სერ ალექსმა კლუბი მე-11 ადგილზე გაიყვანა, თუმცა მომდევნო სეზონში „მანჩესტერ იუნაიტედმა“ მე-2 პოზიცია დაიკავა. მიუხედავად ამისა, შემდეგი 2 წელიც წარუმატებელი გამოდგა, რადგან კლუბი ორივეჯერ ათეულს მიღმა დარჩა.

1990 წელს ფერგიუსონმა პირველი ტიტული მოიგო „მანჩესტერ იუნაიტედში“, მან ასოციაციის თასის ფინალში ლი მარტინის გოლით „კრისტალ პალასი“ დაამარცხა. გავრცელებული ინფორმაციით, სწორედ ამან შეუნარჩუნა ფერგიუსონს მთავარი მწვრთნელის პოსტი.

ამ თასის მოგებით, 5-წლიანი პაუზის შემდეგ კლუბი ევროპულ გათამაშებებს დაუბრუნდა, სადაც პირველივე სეზონში უეფას თასების მფლობელთა თასის ფინალში გავიდა. ფინალში მარკ ჰიუზმა დუბლი შეასრულა და ინგლისურმა კლუბმა 2-1 დაამარცხა იოჰან კრუიფის გაწვრთნილი „ბარსელონა“.

1992 წელს, ფერგი უკვე მორიგ ტიტულს დაეუფლა, ამჯერად მან ინგლისის ლიგის თასი მოიგო. კლუბი ახლოს იყო ინგლისის ჩემპიონატის მოგებასთანაც, თუმცა მხოლოდ 4 ქულით ჩამორჩა „ლიდს იუნაიტედს“. იმავე წლის დეკემბერში, სერ ალექსმა „ლიდსის“ ვარსკვლავი, ერიკ კანტონა გადმოიბირა, რომელმაც დიდი როლი ითამაშა ფერგიუსონის გუნდის აღმასვლაში.

1993 წელს, პირველად 26 წლის შემდეგ, „მანჩესტერ იუნაიტედი“ ინგლისის ჩემპიონი გახდა, მომავალ სეზონში კი ინგლისის ჩემპიონატთან ერთად, სერ ალექსის გუნდი ინგლისის ასოციაციის თასსაც დაეუფლა. გუნდის ერთ-ერთი ლიდერი, რა თქმა უნდა, ერიკ კანტონა იყო, ასევე წამყვანი მოთამაშე გახლდათ დანიელი მეკარე - პეტერ შმეიხელი.

1995 წლის იანვარში, ერიკ კანტონა 8 თვით მოკვეთეს ფეხბურთიდან, „კრისტალ პალასის“ ფანთან მომხდარი ინციდენტის გამო. მისმა არ ყოფნამ ცუდად იმოქმედა გუნდზე, „მანჩესტერ იუნაიტედს’ 1 ქულა დააკლდა ჩემპიონობამდე, ასოციაციის თასის ფინალში კი გუნდი „ევერტონთან“ დამარცხდა.

მომდევნო სეზონში ფერგიუსონის გუნდმა კიდევ ერთი დუბლი შეასრულა, ასოციაციის თასის ფინალში თავის გამოჩენა ერიკ კანტონამ შეძლო და მისი გოლით „იუნაიტედმა“ „ლივერპული“ დაამარცხა. ამავდროულად, აკადემიაში იზრდებოდნენ ისეთი ნიჭიერი მოთამაშეები, როგორებიც რაიან გიგზი, დევიდ ბექემი, გარი ნევილი, ნიკი ბატი, ფილ ნევილი და პოლ სქოულზი იყვნენ.

მომდევნო სეზონში „იუნაიტედი“ ისევ გახდა ინგლისის ჩემპიონი, ერიკ კანტონამ კი მოულოდნელად კარიერის დასრულება გადაწყვიტა, რის გამოც 1998 წელს კლუბი უტიტულოდ დარჩა. მის არ ყოფნასთან ერთად, ფერგიუსონის გუნდს რაიან გიგზი და როი კინი აკლდნენ, ტრავმების გამო.

1998-99 წლების სეზონი კლუბის ისტორიაში ერთ-ერთი ყველაზე წარმატებულია. თავდაპირველად, „მანჩესტერ იუნაიტედი“ ბოლო ტურში გახდა ინგლისის ჩემპიონი, მათ 1 ქულით აჯობეს „არსენალს“. 6 დღის შემდეგ გუნდი ინგლისის ასოციაციის თასის გამარჯვებული გახდა, 26 მაისს კი, პირველად, 1968 წლის შემდეგ, „მანჩესტერ იუნაიტედი“ ჩემპიონთა ლიგის გამარჯვებული გახდა. ფერგიუსონის გუნდმა მძიმე ეტაპები გაიარა, ფინალში მანჩესტერელები 90-ე წუთამდე მარცხდებოდნენ, თუმცა ტედი შერინგემის და ოლე გუნარ სულშერის გოლებით მათ მატჩის მოგება ძირითად დროშივე შეძლეს. ფინალის მოგების შემდეგ ალექს ფერგიუსონს რაინდის წოდება მიენიჭა. რამდენიმე თვეში „მანჩესტერმა“ მე-4 ტიტულის მოგებაც შეძლო, საკონტინენთაშორისო თასზე ფერგიუსონის ბიჭებმა 1-0 დაამარცხეს „პალმეირასი“. „მანჩესტერ იუნაიტედი“ კი გახდა პირველი ინგლისური კლუბი, რომელმაც მსოფლიო ჩემპიონის ტიტული მოიპოვა და ასევე შეასრულა ტრებლი.

მომდევნო სეზონშიმ ფერგიუსონმა ისევ შეძლო პრემიერ ლიგის ტიტულის დაცვა და 18 ქულით აჯობა „არსენალს“, ტენდენცია არც 2000-01 წლების სეზონშიც შეცვლილა და ფერგიუსონმა ზედიზედ მესამედ მოახერხა ინგლისის ჩემპიონობა. ამავე სეზონის შუა ნაწილში ფერგიუსონი კარიერის დასრულებაზე ფიქრობდა, თუმცა საბოლოო ჯამში გადააფიქრებინეს.

2000 და 2001 წელს კლუბი ჩემპიონთა ლიგი გამარჯვებული ვერ გახდა, ამიტომ 2002 წლის სატრანსფერო ბაზარზე „იუნაიტედი“ გააქტიურდა და შეიძინა ისეთი მოთამაშეები, როგორებიც რუდ ვან ნისტერლოი, ლორან ბლანი, ხუან სებასტიონ ვერონი არიან. მიუხედავად ასეთი ტრანსფერებისა, კლუბმა მაინც ვერ შეძლო ტიტულების მოგება. მთავარი პრობლემა კი დაცვითი ხაზი იყო, რომელიც იაპ სტამის წასვლის შემდეგ მოიშალა. ამის გამოსასწორებლად ფერგიუსონმა 30 მილიონ გირვანქა სტერლინგად რიო ფერდინანდი შეიძინა, რომლის ტრანსფერმაც ნამდვილად გაამართლა.

ფერდინანდი დაეხმარა კლუბს პრემიერ ლიგის ჩემპიონობაში, თუმცა 2002-03 წლების სეზონში ის დოპინგ ტესტზე არ გამოცხადდა, რის გამოც 8 თვით აუკრძალეს ფეხბურთის თამაში. იმავე წლის ზაფხულში „მანჩესტერ იუნაიტედი“ ინგლისელმა ვარსკვლავმა, დევიდ ბექემმაც დატოვა.

ფერგიუსონი 3 წლის განმავლობაში ტიტულს ვერ იგებდა, რის გამოც მან ახალი გუნდის შენება დაიწყო. „მანჩესტერ იუნაიტედი“ ხუან სებასტიან ვერონმა, ფაბიენ ბარტეზმა, ნიკიბატმა, დიეგო ფორლანმა, ფილ ნევილმა, რუდ ვან ნისტერლოიმ და როი კინმა დატოვეს. მათ სანაცვლოდ ფერგიუსონმა კრისტიანო რონალდუ, უეინ რუნი, ედვინ ვან დერ საარი, პარკ ჯი სუნგი, ნემანია ვიდიჩი, პატრის ევრა, მაიკლ კერიკი და ლუიშ ნანი დაიმატა.

2004-დან 2007 წლამდე „მანჩესტერმა“ მხოლოდ 2 ტურნირი მოიგო : ასოციაციის თასი (2004) და ლიგის თასი (2006).  მომდევნო სეზონში კი ფერგიუსონმა დაიბრუნა ინგლისის ჩემპიონის ტიტული, სეზონის ბოლოს კი წლის საუკეთესო ფეხბურთელი და წლის საუკეთესო ახალგაზრდა, კრისტიანო რონალდუ გახდა. კლუბი ჩემპიონთა ლიგის ნახევარფინალშიც გავიდა, სადაც ორი მატჩის ჯამში 3-5 დამარცხდა „მილანთან“.

2008 წელს, „მანჩესტერ იუნაიტედი“ ისევ გახდა ინგლისის ჩემპიონი, კლუბი ამავდროულად დაეუფლა ჩემპიონთა ლიგის ტიტულსაც - მესამედ. ინგლისის ჩემპიონატში ფერგიუსონის ბიჭებმა 2 ქულით აჯობეს „ჩელსის“, ევროპული ტურნირის ფინალში კი ასევე „ჩელსი“ დაამარცხეს, პენალტების სერიაში.

კრისტიანო რონალდუმ ამ სეზონში ყველა ტურნირზე 42 გოლი გაიტანა და გახდა „მანჩესტერ იუნაიტედის“ ისტორიაში მეოთხე ფეხბურთელი, რომელმაც ოქროს ბურთი მოიგო.

„იუნაიტედი“ ზედიზედ მესამედ გახდა ინგლისის ჩემპიონი, პარალელურად კლუბი ისევ გავიდა ჩემპიონთა ლიგის ფინალში, თუმცა ამჯერად ისინი „ბარსელონასთან“ 0-2 დამარცხდნენ. იმავე სეზონში „მანჩესტერმა“ ინგლისის ლიგის თასის ფინალში, პენალტების სერიაში „ტოტენჰემი“ დაამარცხა.

სეზონის ბოლოს გუნდი კრისტიანო რონალდუმ დატოვა, ის „რეალში“ 80 მილიონი გირვანქა სტერლინგის სანაცვლოდ გადავიდა, რაც იმ დროისთვის მსოფლიო ფეხბურთის სარეკორდო ტრანსფერი იყო.

2009-10 წლების სეზონში ფერგიუსონის ბიჭები მხოლოდ 1 ქულით ჩამორჩნენ „ჩელსის“, თუმცა ლიგის თასი ზედიზედ მეორედ მოიგეს. სეზონის ბოლოს წლის სუაკეთესო ფეხბურთელად უეინ რუნი დასახელდა, რომელიც ამჯერად თავის ეპოქას ქმნიდა ინგლისურ გრანდში.

2011 წელს, „მანჩესტერ იუნაიტედმა“ მე-19-დ მოიგო ინგლისის ჩემპიონატი და გადაასწრო „ლივერპულს“, 

ინგლისის ჩემპიონობების რაოდენობით. ფერგიუსონმა ისევ გააღწია ჩემპიონთა ლიგის ფინალში, თუმცა ამჯერადაც ისინი 1-3 დამარცხდნენ „ბარსელონასთან“. მომდევნო სეზონში კლუბმა დრამატულად დათმო პრემიერ ლიგის ტიტული „მანჩესტერ სიტისთან“, რომელმაც ბურთების სხვაობით აჯობა „იუნაიტედს“ და პირველად, 44 წლის მანძილზე, მოიპოვა ინგლისის ჩემპიონის ტიტული.

2012 წლის ზაფხულში „მანჩესტერ იუნაიტედს“ „არსენალის“ ფორვარდი და პრემიერ ლიგის ბომბარდირი, რობინ ვან პერსი შეუერთდა. მან მთავარი როლი ითამაშა 2012-13 წლების სეზონში, როდესაც კლუბმა მე-20-დ მოახერხა ინგლისის ჩემპიონატის მოგება.

2013 წლის 8 მაისს დიდი ეპოქა დასრულდა, სერ ალექს ფერგიუსონმა პოსტის დატოვების შესახებ განაცხადა. მან 26 წელი უხელმძღვანელა გუნდს, ამ დროის განმავლობაში კი 38 ტიტული მოიგო. სერ ალექსი კლუბის ისტორიაში ყველაზე წარმატებული მწვრთნელია.

 

"მანჩესტერი" ფერგიუსონის წასვლის შემდეგ

 

ფერგიუსონის წასვლის შემდეგ, კლუბის მთავარ მწვრთნელად „ევერტონის“ ყოფილი დამრიგებელი, ასევე შოტლანდიელი დეივიდ მოიესი დაინიშნა. მისი მწვრთნელობისას კლუბის საქმეები უკან წავიდა, „მანჩესტერ იუნაიტედმა“ პრემიერ ლიგაში მე-7 ადგილი დაიკავა და 1996 წლის შემდეგ პირველად, კლუბი ვერ მოხვდა ჩემპიონთა ლიგაზე. მოიესმა ვერც სხვა ტურნირებზე მიაღწია წარმატებას, რის გამოც 2014 წლის 22 აპრილს მან თანამდებობა დატოვა, გუნდს კი სეზონი რაიან გიგზმა დაასრულებინა.

იმავე წლის 19 მაისს მთავარი მწვრთნელი ნიდერლანდელი ლუი ვან გაალი გახდა, გიგზი ამჯერად მის სამწვრთნელო შტაბს შეუერთდა. ვან გაალმა სატრანსფერო ბაზარზე იაქტიურა, მან გუნდში ანხელ დი მარია, დელი ბლინდი, ანდერ ერერა, მარკოს როხო, ლუკ შო და იჯარით რადამელ ფალკაო მიიყვანა. კლუბი პრემიერ ლიგაში მე-4 ადგილზე გავიდა და ჩემპიონთა ლიგაზეც დაბრუნდა, თუმცა პროგრესი მაინც არ ჩანდა. შემდეგ სეზონში ვან გაალმა ბასტიან შვაინშტაიგერი და ენტონი მარსიალიც შეიძინა, გუნდის შემადგელობა საგრძნობლად შეიცვალა.

2015-16 წლების სეზონში, ვან გაალის გაწვრთნილმა გუნდმა პირველი ტურნირი - ინგლისის ასოციაციის თასი მოიგო. ფინალში მათ დამატებით დროში 2-1 სძლიეს „კრისტალ პალასს“. მიუხედავად ამისა, გუნდის სეზონი წარუმატებლად ჩაითვალა და საბოლოოდ პოსტი ვან გაალმაც დატოვა.

2016 წლის 27 მაისს „მანჩესტერ იუნაიტედის“ მწვრთნელი ჟოზე მოურინიო გახდა. ამჯერად მან განახორციელა დიდი ტრანსფერები, ჟოზემ „მანჩესტერში“ ერიკ ბაიი, ზლატან იბრაჰიმოვიჩი, ჰენრიკ მხითარიანი და პოლ პოგბა მიიყვანა. უკანასკნელი მათგანის ტრანსფერი ინგლისურ გუნდს 89 მილიონი გირვანქა სტერლინგი დაუჯდა, რაც მსოფლიოს ახალი სარეკორდო ტრანსფერი გახდა.

მოურინიომ სადებიუტო მატჩი სუპერთასის ფინალში გამართა, სადაც „ლესტერ სიტი“ 2-1 დაამარცხა და მანჩესტერული კარიერა წარმატებით დაიწყო. თუმცა, ინგლისის ჩემპიონატში მან მხოლოდ მე-6 პოზიცია დაიკავა. მიუხედავად ამისა, მოურინიომ ინგლისის ლიგის თასის ფინალში 3-2 მოუგო „საუთჰემპტონს“, ხოლო რამდენიმე თვეში გუნდი ისტორიაში პირველად, უეფა ევროპა ლიგის ფინალში გავიდა, სადაც 2-0 დაამარცხა „აიაქსი“.

„მანჩესტერ იუნაიტედი“ მე-5 კლუბი გახდა, „იუვენტუსის“, „აიაქსის“, „ბაიერნის“ და „ჩელსის“ შემდეგ, რომელმაც სამივე მთავარი ევროპული საფეხბურთო ტურნირი მოიგო.

აღნიშნულ სეზონში „მანჩესტერ იუნაიტედის“ ყველა დროის საუკეთესო ბომბარდირი უეინ რუნი გახდა, მან ბობი ჩარლტონს გადაასწრო, სეზონის ბოლოს კი ინგლისელი ფორვარდი „ევერტონში“ დაბრუნდა.

მომდევნო სეზონში „იუნაიტედმა“ პრემიერ ლიგაში მე-2 პოზიცია დაიკავა, თუმცა ვერც ერთი ტურნირი ვერ მოიგო. მოურინიომ 2018 წლის 18 დეკემბერს მთავარი მწვრთნელის პოსტი დატოვა, სეზონის ბოლომდე კი დროებით მწვრთნელად ოლე გუნარ სულშერი დაინიშნა.

2019 წლის 28 მარტს ოლე გუნარ სულშერმა 3-წლიანი კონტრაქტი გააფორმა და „მანჩესტერ იუნაიტედის“ მწვრთნელი გახდა, ის დღემდე უძღვება კლუბს.

poll გამოკითხვა

რომელ ადგილზე დაასრულებს გუნდი სეზონს ?

1
2
3
4
ოთხეულს მიღმა
სულ პასუხები: 218
loss დანაკლისი
injury

ტრავმები

ენტონი მარსიალი.

red_yellow

ყვითელი და წითელი ბარათები

არავინ